ភ្នំពេញ៖ នាយករដ្ឋមន្ត្រីកម្ពុជា និងជាប្រធានគណបក្សប្រជាជនកម្ពុជា សម្ដេចតេជោ ហ៊ុន សែន បានបញ្ជាក់ថា ក្នុងនាមជាគណបក្សដឹកនាំរដ្ឋ គណបក្សប្រជាជនមិនបណ្ដោយឱ្យប្រជាពលរដ្ឋណាម្នាក់ស្លាប់ដោយអត់បាយ ហើយរដ្ឋមិនបានដឹងនោះទេ។

ថ្លែងក្នុងពិធីជួបសំណេះសំណាល និងអបអរសាទរខួបអនុស្សាវរីយ៍ទី១៣៧ នៃទិវាពលកម្មអន្តរជាតិ និងជួបសួរសុខទុក្ខសហជីព សាខាគណបក្សតាមរោងចក្រ បុគ្គលិកសិក្សា និងតំណាងកម្មករទូទាំងប្រទេសព្រឹកថ្ងៃទី២៣ ខែមេសា ឆ្នាំ២០២៣ នេះនៅសាលមហោស្រព កោះពេជ្រ រាជធានីភ្នំពេញ សម្ដេចតេជោ ហ៊ុន សែន បានថ្លែងថា «យើងត្រូវតែយកចិត្តទុកដាក់មើលឲ្យបានគ្រប់ជ្រុងជ្រោយចំពោះប្រជាពលរដ្ឋដែលជួបទុក្ខលំបាក»។

គណបក្សប្រជាជនកម្ពុជាត្រូវបានបង្កើតឡើងនៅថ្ងៃទី២៨ ខែមិថុនា ឆ្នាំ១៩៥១ ជាគណបក្សដែលមានវ័យចំណាស់ និងធំជាងគេនៅកម្ពុជាដែលបានឆ្លងកាត់ប្រវត្តិសាស្ត្រនិងការដឹកនាំរដ្ឋកម្ពុជាពីឆ្នាំ១៩៧៩ រហូតដល់បច្ចុប្បន្ន។ ក្រោមការដឹកនាំរបស់គណបក្សប្រជាជនកម្ពុជាត្រូវបានគេកត់សម្គាល់ពីភាពរីកចម្រើនគួរឱ្យកត់សម្គាល់ខណៈជីវភាពរស់នៅរបស់ប្រជាពលរដ្ឋកាន់តែប្រសើរ៕